धेरैको चाहना हुन्छ, प्रेम सम्बन्ध अटुट रहोस् । भ्यालेन्टाइन डे अर्थात् प्रेम दिवसको अवसर पारेर प्रेम प्रस्ताव राख्न इच्छुक युवायुवतीहरु धेरै भेटिन्छन् । तर, भ्यालेन्टाइन भन्दा पनि आफ्नो राशी अनुसार प्रेम सम्बन्ध राख्न खोजे सफलता हात लाग्ने ज्योतिषीहरुको दाबी छ । ज्योतिष शास्त्र अनुसार तपाईं पनि राशीमा विश्वास गर्नुहुन्छ भने निम्न तरिका अपनाउन सक्नुहुनेछ ।
मेषः यो राशीका मानिसहरु खासगरी सिंह राशीप्रति आकषिर्त हुन्छन् । तर, मकर र कुम्भ राशीसितको सम्बन्ध दिगो हुने गर्दछ । मेष राशी भएकाहरु व्यक्तिगत कारणले अरु राशीलाई पनि मन पराउँछन्, तर प्रेमभन्दा व्यक्तिगत आधारमा ।
मेष राशी भएकाहरुले प्रेम प्रस्ताव राख्ने उपयुक्त समय विहान हो । मेष राशी सूर्यसँग सम्बन्धित भएकोले सूर्योदयसँगै प्रेम प्रस्ताव राख्नु फलिफाप हुन्छ । मेष राशीका मानिसमा लेखाइभन्दा बोली प्रभावकारी मानिन्छ । त्यही भएकोले फेसबुक वा एसएमएसभन्दा पनि भेटेरै वा फोनमा प्रस्ताव राख्नु उपयुक्त हुन्छ ।
प्रस्ताव राख्दा पहिरनमा पनि ध्यान दिनुपर्दछ । यो बेला रातो कपडा लगाउनु राम्रो हो । पूर्व दिशामा फर्किएर प्रस्ताव राख्दा सफलता हात लाग्ने सम्भावना बढी हुन्छ । प्रस्तावसँगै गिफ्ट दिनुस्, झन् राम्रो । प्याजी रङ्गको कार्ड र माटोले निर्मित रातो उपहार दिनु बढी राम्रो हो ।
यो राशी भएकाहरुले प्रेमी वा प्रेमिकालाई तेलमा तारेको वा पोलेको खानेकुराले स्वागत गर्न ठीक हुन्छ । डेटिङमा जाँदा एकान्त तर उज्यालो ठाउँ छान्नुहोस् । किस खाँदा निधार रोज्नुहोस् ।
वृषः वृष राशीका लागि उपयुक्त भ्यालेन्टाइन कन्या राशीको छान्नु फाइदाजनक हुन्छ । सूर्योदयको चार घन्टाभित्र प्रेम प्रस्ताव राख्नु राम्रो हो । हुन त मिथुन, वृश्चिक र मकर राशीका व्यक्तिसँग पनि प्रेम गर्न सक्छन्, तर कन्या बढी उपयुक्त हुन सक्छन् ।
प्रस्ताव राख्दा फेसबुक, फोन वा एसएमएसजस्ता सञ्चार साधनको प्रयोग लाभदायी हन्छ । प्रस्ताव राख्दा वा राखेको पहिलो भेटमा क्रिम कलरको कपडा लगाउनु राम्रो हो । पशुपंक्षीको चित्र वा मूर्ति र चाँदी रंगको उपहार दिनु प्रभावकारी हुनसक्छ ।
रेष्टुरेन्टमा जाँदा गोलो आकारको मिठाइ खानु उपयुक्त हुन्छ । किस गर्दा घाँटीको दायाँबायाँ गर्न सकिन्छ । साथै, डेटिङ क्रममा अनाथ वा वृद्धवृद्धाको सेवा गरे योजना सफल हुन्छ ।
मिथुनः यो राशीका लागि उपयुक्त राशी तुला हो तर धनु, वृष, मीन राशी पनि ठिकै हुन्छन् । यो राशीका मान्छेले विहान १० देखि १ बजेसम्म वा सू र्य अस्ताएपछि प्रस्ताव राख्नु उपयुक्त हुन्छ । हरियो वा निलो कपडा लगाएर जानु र उत्तर फर्किएर प्रस्ताव राख्नु ठीक हुन्छ ।
उपहार भने आवाज आउने, बत्ती बल्ने आदि खाले दिन सकिन्छ । आयातकार निलो मसीले लेखिएको कार्ड उपहार दिनुहोस् । खानेकुरामा अमिलो र पिरो खाले दिनुहोस् । सिनेमा हल, पार्क, बगैंचा, बजार आदि ठाउँमा डेटिङ जानुहोस् ।
त्यसो त घरबाट निस्कनुअघि दायाँ खुट्टा पहिले निकालेर जानुहोस् र प्रेम प्रस्ताव राख्नुहोस् । प्रस्ताव ओके हुने सम्भावना बढी हुन्छ ।
कर्कटः कर्कट राशीको लागि वृश्चिक राशीका व्यक्ति उपयुक्त हुन्छन् । मेष र कुम्भ पनि मिल्दो हुन सक्छन् । खैरो, सेतो वा निलो रङको कपडा लगाएर प्रस्ताव राख्नुहोस् । पूर्व दिशा फर्किएर प्रस्ताव राख्नुहोस्, रिजल्ट सही आउन सक्छ ।
मोबाइल, आइफोन, आकर्षक जनावरको मूर्ति आदि उपहार दिन सक्नु हुनेछ । खैरो गातामा भ्यालेन्टाइन कार्ड दिँदा राम्रो मानिन्छ । कार्डमा गाढा रातो अक्षरले लेखिएको हुनुपर्छ । ताल, नदी, चिडियाखाना आदि ठाउँमा डेटिङ जानुहोस् । फ्लाइङ किस प्रभावकारी उपाय हो । पर्स, बेल्ट, मनी व्यागजस्ता उपहार दिनुहोस् ।
सिंहः यो राशी भएको मानिसलाई मेष राशीको जोडी छान्नु राम्रो हुन्छ । तर, सिंह राशीसँग पनि सम्बन्ध बढाउन सकिन्छ । यो राशी भएका व्यक्तिले दिउँसो १२ देखि ३ बजेसम्म प्रस्ताव राख्दा नतिजा सही निस्कन सक्छ । प्रस्ताव इमेल वा कुनै पनि इलेक्ट्रोनिक्स डिभाइसको सहायताले गर्नु फलदायी हुन्छ । यद्यपि, इमेल वा सन्देश पठाउन भने १२ देखि ३ बजेबीचको समय नै छान्नुपर्छ । प्रेम प्रस्ताव राख्दा वा लेख्दा गाढा रातो, गाढा नीलो तथा गाढा सुन्तला रङ्गको पहिरन लगाएर दक्षिण दिशा र्फकनु उपयुक्त हुन्छ ।
भेटेरै प्रस्ताव राख्ने हो भने सैनिकझैं सिधा उभिएर आत्मविश्वासका साथ आँखामा आँखा जुधाएर प्रेमप्रस्ताव राख्नुपर्छ । उपहार दिँदा शिर ठाडो राखेर दिनुपर्छ । बाहिरी आवरणमा प्वाल तथा गाढा रातो गाता भएको कार्ड प्रयोग गर्नु राम्रो हुन्छ । भेटघाटपछि चकलेट, केकजस्ता गुलियो र कोमल मिठाई खानुपर्छ । ओठमा किस गर्नु उपयुक्त हुनसक्छ । अर्को महत्वपूर्ण कुरा, प्रस्ताव गर्ने क्रममा आˆनो शिर टोपी, सल वा अन्य कपडाले छोपे प्रेम अटुट रहन्छ ।
कन्याः यो राशी भएका व्यक्ति कोमल मनका हुन्छन् । यस्ता व्यक्तिले वृष राशी भएका व्यक्तिसँग सम्बन्ध बढाउनु राम्रो हुन्छ । तुला, धनु तथा मिन राशीसँगको सम्बन्ध पनि ठिकै हुन्छ । यो राशी भएका व्यक्तिले प्रस्ताव राख्दा मध्याहृन ३ देखि साँझ ६ बजेको समय रोज्नु उपयुक्त हुन्छ । हरियो वा सेतो वस्त्र धारण गर्नु उपयुक्त हुन्छ । आफूलाई मन पर्ने रङ्गको कपडामा प्रेमका शब्दहरू लेखेर पश्चिम दिशा फर्किएर दिए प्रस्ताव स्वीकार हुनसक्छ ।
उपहारका लागि काठको सामग्री प्रभावकारी हुन्छ । फुलबुट्टाले भरिपूर्ण गातारहित कार्ड रोज्नु राम्रो हुन्छ । प्रस्ताव राख्दा पश्चिम दिशातर्फ फर्किनु राम्रो हो । आफैंले पकाएको परिकार ख्वाउँदा भ्यालेन्टाइनसितको सम्बन्ध प्रगाढ हुन्छ । डेटिङका लागि बालबालिका खेल्ने स्थान रोज्नु राम्रो हुन्छ । गालामा चुम्बन गर्नु प्रभावकारी हुन्छ । तर यो राशी भएको व्यक्ति पुरुष भए निधारमा रातो टीका र युवतीले रातो नङ पोलिस लगाउनु उपयुक्त हुन्छ ।
तुलाः मिथुन राशी यो तुला राशीलाई मिल्ने हुन्छन् । मेष र मकरसँगको सम्बन्ध पनि सकारात्मक रहन्छ । यो राशीका व्यक्तिले प्रेम प्रस्ताव राख्ने उत्तम समय साँझ ६ देखि ९ बजेसम्म मानिन्छ । सुन्तला वा कलेजी रङ्गका पहिरन लगाएर प्रस्ताव राखे सफलता पाउने सम्भावना बढी हुन्छ । उपहारका लागि स्याम्पो, तेल, क्रिम, लोसन आदि जेल पदार्थहरु प्रभावकारी हुन्छन् ।
सुन्तला, कलेजी रङको गाताभित्र राखी अण्डा आकारको कार्ड दिनु उपयुक्त हुन्छ । डेटिङमा खुला जमिनमा बसेर गफिएमा प्रभावकारी हुन्छ । किसभन्दा अंगालोमा बाँधेर माया साट्नु राम्रो हुन्छ ।
वृश्चिकः यो राशीका लागि कर्कट राशी उपयुक्त मानिन्छ । यसबाहेक सिंह र कन्या राशी भएका व्यक्तिसँग पनि वृश्चिक राशीको सम्बन्ध गाढा हुन सक्छ । गुलाबी र सेतो रङ्गको पहिरन लगाएर पूर्व दिशामा फर्किएर प्रस्ताव राख्दा राम्रो हुन्छ । प्रस्ताव सूर्यास्तमा राख्दा बढी प्रभावकारी हुन्छ । उपहारमा मनोरञ्जनका सामग्रीहरू दिनु राम्रो हुन्छ । भ्यालेन्टाइन कार्डमा सेलिब्रेटीहरूका तस्वीर छापिएका चम्किलो सेतो, गुलाबी गोलाकार कार्ड प्रयोग गर्नु ठीक हुन्छ ।
मह तथा गुलियो तरल पदार्थको खानेकुरा खानु खुवाउनु राम्रो हुन्छ । फिल्म हल, कन्सर्ट, डिस्कोजस्ता रमाइलो संगीतमय ठाउँमा डेटिङ जानु राम्रो हो । पि्रयजनको दुवै आँखामा चुम्बन गर्नु प्रभावकारी हुन्छ । साथै, भ्यालेन्टाइनलाई भेट्न जाँदा चाँदीको गहना प्रयोग गर्दा सम्बन्ध बलियो हुन्छ ।
धनुः यो राशीको सम्बन्ध कुम्भ राशीसँग निकै राम्रो हुन्छ । त्यसबाहेक मेष र सिंह राशी भएका व्यक्तिसँग पनि ठीकै हुन्छ । सूर्यास्त समयमा दक्षिण फर्किएर फोनको माध्यमबाट प्रस्ताव राख्नु सबैभन्दा प्रभावकारी हुन्छ । प्रस्ताव राख्दा पहेंलो पहिरन लगाउनु पर्दछ । प्रस्ताव राख्दा फोनलाई दुई हातले समाउनुपर्छ । बाँस अथवा कागजले बनेका सामाग्रीहरू उपहार दिँदा माया प्रगाढ हुनसक्छ ।
भ्यालेन्टाइन कार्डचाहिँ पहेलो गातामा रातो थोप्ला भएका त्रिकोण आकारमा रोज्नुपर्ने हुन्छ । शाकाहारी तथा रसले भरिएको मिष्ठान्न परिकार खुवाउनु राम्रो हुन्छ । दूबोले भरिएको मैदान तथा पहेंला फूल भएको ठाउँमा डेटिङ जानुपर्दछ । शीर वा निधारमा चुम्बन गर्दा ठिक हुन्छ ।
मकरः मेष राशीका व्यक्ति बढी उत्तम हुन्छन् । कन्या र कर्कट राशी पनि ठिकै हुन्छन् । राति पश्चिम दिशा फर्किएर प्रस्ताव राख्नुस् । प्रत्यक्ष भेटेर प्रस्ताव राख्दा कालो अथवा निलो कपडा लगाउनुहोस् ।
इलेक्ट्रोनिक्स उपहार दिनु सबभन्दा उत्तम हो । भ्यालेन्टाइन कार्ड पनि आवाज आउने खालको वर्गाकार, आयताकार रोज्नुहोस् । सपिङ्ग मल तथा प्रविधिले भरिएको थलोमा डेटिङ जानुहोस् । कान नजिक किस गर्दा उपयुक्त हुन्छ । तर प्रस्ताव गर्ने क्रममा छालाजन्य वालेट तथा ब्यागहरूको प्रयोग गर्नु हुँदैन ।
कुम्भः तुला राशीका व्यक्तिसँग प्रेम सम्बन्ध गाँस्नु ठीक हुन्छ । तथापि, वृष र कर्कट राशी पनि उपयुक्त हुन्छन् । राति प्रस्ताव राख्नु उपयुक्त हुन्छ । निला पहिरन लगाएर प्रेयसी भेट्नु ठीक हुन्छ । उत्तर फर्किएर दायाँ कानमा सुटुक्क प्रस्ताव राखे राम्रो हुन्छ । चारकुने ढुङ्गामा आफ्नो प्रेयसीको नाम वा फोटो अंकित गरेको उपहार दिनुहोस् । नीलो रङ्गमा धागो बेरिएको कार्ड दिनु उपयुक्त हुन्छ । सँगै भोजन गर्दा नन भेज, पोलेको वा साँधेको रोज्नु राम्रो हो ।
घरदेखि दक्षिण वा उत्तरतर्फ डेटिङ जानु उपयुक्त हुन्छ । डेटिङमा कपास वा परालको चकटी, म्याट्रेस आदिमा बस्नु लाभदायक हुन्छ । किस गर्दा दायाँ गालामा सामान्य तरिकाले गर्नुहोस् ।
मीनः तुलासँग राम्रो सम्बन्ध हुन सक्छ । त्यसबाहेक मिथुन र कन्यासँगको सम्बन्ध पनि उपयुक्त हुन्छ । सूर्योदयअघि स्नान गर्नुहोस् अनि पूर्व फर्किएर प्रस्ताव राख्नुहोस् । भेटेरै प्रस्ताव राख्दा पहेंलो टीका र पहेंलो पहिरन लगाउनुहोस् । भगवानको मूर्ति, सुन वा तामाले बनेको औँठी उपहार दिनुहोस् ।
भ्यालेन्टाइन कार्ड गोलाकार साइजमा पहेलो रंग बढी भएको रोज्नुहोस् । दूधबाट बनेको मिठाइ खुवाउनुहोस् । पानीको प्राकृतिक स्रोत भएको मठ, मन्दिरतिर डेटिङ जानु ठीक हुन्छ । तर डेटिङको पहिलो अवसरमै किस गर्नु उपयुक्त हुँदैन । साथै, प्रेयसी भेट्न जाँदा पानीले भनिएको कलश वा एक्वारियमलाई दायाँ पारेर निस्कनुहोस् । साइत राम्रो बन्छ ।
